दुनिया के अइसन कौनो कोना नइखे जहाँ भोजपुरी ना सुनाई परे | गाँव, जवार, दूर देश में होखीं चाहे बिदेस में - हमनी के भोजपुरी परिवार एगो छाता के नीचे बा | गंगा के बीचों-बीच पनपल, कई सौ साल से भी अधिक अगर कौनो भाषा-संस्कृति जीवित बा, त ऊ ह आपन भाषा - भोजपुरी | आपन माटी से जुडल हर आदमी चाहेला | उत्तर प्रदेश, बिहार आ झारखण्ड अलग होके भी एगो बड़का परिवार जनाला | सादगी, ईमानदारी, मेहनत, लगन आ अपनापन पूर्वांचल के सभ्यता ह | ई सभ्यता के असली पहिचान ह मिसरी जैसन मीठ भाषा भोजपुरी - जवना के हमनी के अपने आप में बोले, सीखे और बतियावे के भरपूर कोसिस करे के चाहीं | पूर्वांचल में ज्ञान के लालियो बा आ खेत के हरियाली भी | भोजपुरी गाना, खाना, तीज- त्यौहार के साथे पढाई-लिखाई, शिक्षा, बियाह, नौकरी, व्यापार, स्वास्थ्य, मीडिया, समाचार - हर क्षेत्र के जानकारी से ही भोजपुरिया समाज के उन्नति होई |

भोजपुरी के प्रकाश दुनिया भर में फैले - भोजपुरी एक्सप्रेस नेटवर्क के इहे उद्देश्य बा | इंटरनेट पर भोजपुरी वेबसाइट त बा लेकिन भोजपुरिया समाज में एक-दूसरा के ठीक से जाने के मौका कभी ना मिलल | जहवाँ भी बनी, कुछ अइसन करीं कि लोग हमनी के समाज के सिर उठाय के देखे आ कहे - भोजपुरी समाज शिक्षित, संपन्न आ सफल बा |

शैलेश मिश्र ( अमेरिका)
भोजपुरीएक्सप्रेस.कॉम